♦ Ցանկացած երկու կետով կարելի է տանել ուղիղ, այն էլ` միայն մեկը:
♦ Ուղղի երկու կետերով առանձնացված մասը կոչվում է հատված: Կետերը կոչվում են հատվածի ծայրակետեր:
♦ Հատվածի այն կետը, որը հատվածը բաժանում է երկու հավասար մասերի, կոչվում է հատվածի միջնակետ:
♦ Հատվածի երկարությունը հավասար է այն երկու հատվածների երկարությունների գումարին, որոնց բաժանվում է իր կամայական կետով:
♦ Ուղղի տրված կետի մի կողմում գտնվող կետերի բազմությունը կոչվում է ճառագայթ: Այդ կետը կոչվում է ճառագայթի սկզբնակետ:
♦ Երկու հատվող ուղիղներ կոչվում են ուղղահայաց, եթե նրանք կազմում են չորս ուղիղ անկյուն:
♦ Երկու ուղիղներ, որոնք ուղղահայաց են երրորդին, չեն հատվում (զուգահեռ են):
♦ Հատվածի միջնուղղահայաց է կոչվում այն ուղիղը, որն անցնում է այդ հատվածի միջնակետով և ուղղահայաց է նրան:
♦ Հատվածի միջնուղղահայացի յուրաքանչյուր կետ հավասարահեռ է հատվածի ծայրակետերից:
♦ Հատվածի ծայրակետերից հավասարահեռ յուրաքանչյուր կետ գտնվում է հատվածի միջնուղղահայացի վրա:
